MTAZAMO: NINI KIPIMO CHA MAFANIKIO YAKO?

In order to succeed, your desire for success should be greater than your fear of failure.-Bill Cosby

__________________________

Picha na www.e-marketingassociates.com

Tunapozungumzia mafanikio ni ile hali ya kujihisi vizuri kutokana na kuishinda au kuzishinda changamoto zilizopo na zile zinazojiinua katika maisha; ukizingatia kuwa kuna mapitio kadha wa kadha yenye changamoto mbali mbali katika kuelekea kutimiza malengo tarajiwa. Kama ilivyo kawaida kuwa katika kuelekea mafanikio,changamoto nazo hazikosi kujitokeza.

Mafanikio ya kirahisi bila kulipa gharama kupitia changamoto yana mashaka! Wanawake waliambiwa utazaa kwa uchungu na mwishowe kufurahia mtoto aliyezaliwa na kusahau hali ya uchungu wao, vile vile kwa wanaume waliambiwa utakula kwa jasho mwishowe kusahau machungu ya kazi zao kipindi cha kusheherekea mafanikio; Maandiko Matakatifu yameainisha kuhusu hili.

Hakuna mtu asiyependa kutimiza malengo yake yaliyo sanjali na shauku ya mafanikio. William Henry "Bill" Cosby mchekeshaji na mwana harakati maarufu mwenye mafanikio makubwa duniani anaweka angalizo kuhusu jinsi ya kupata mafanikio kwa kuzingatia shauku ya mafanikio kwa kusema; “ili kufanikiwa, shauku ya mafanikio yako inapaswa kuwa kubwa kuliko hofu ya kushindwa.”

Ukifuatilia kwa makini mtazamo wa Cosby kuhusu mafanikio utabaini kuwa watu wengi hukinzana naye kwa kutanguliza hofu ya kushindwa kabla ya kukabiliana na hali halisi kuelekea mafanikio yenye msukumo wa ndani wa shauku ya mafanikio. 

Kipimo Cha Mafanikio

Watu wengi wanashindwa kuweka uwiano mzuri kati ya shauku ya mafanikio na hofu ya kushindwa…uhalisia uliopo ni kwamba, watu wengi hutawaliwa na hofu ya kushindwa ipelekeayo kuelemea shauku ya mafanikio! Sambamba na hali hii tujiulize maswali ya msingi kuhusu kipimo cha uwiano wa mafanikio; je, nini kipimo cha mafanikio ya mtu binafsi? …je, ni ule uwezo wa mtu kuzishinda changamoto? au ni ule uwezo wenye uthubutu wa kuishinda hofu ya kushindwa kwanza?

Kutoa majibu ya maswali hayo si jambo la haraka haraka; namaanisha si kuangalia kigezo kimoja na kujiaminisha au kujiridhisha kimtazamo.Mara nyingi katika mafunzo yangu nasisitiza kuwa; mtazamo ulionao kukuhusuukijilinganisha na ule wa watu wengine unakuwa uhalisia wako kama utaamini nakujichukulia.(Mfano: mtu aweza kujiaminisha kuwa mafanikio ya wengi kiuchumi si kwa njia halali; ni lazima ufanye wizi, ukiuke taratibu za kiutendaji, utumie uchawi au ufanye mauaji…huu unakuwa uhalisia wa maisha yake kwa sababu ni mtazamo wake uliohusisha kujiaminisha.

Mafanikio ya kweli, yenye kuzingatia shauku ya mafanikio kwanza kuliko hofu ya kushindwa hupimwa kwa kuzingatia uwezo wa kifedha/kipato halali (uhuru wa kipato) kukidhi mahitaji mbali mbali ya kibinadamu (human needs) sanjali na kutimiza hitaji la msingi la kisaikolojia (uhuru wa nafsi na fikra).

Kutimiza hali ya kisaikolojia sambamba na mafanikio inatazamwa kwa jicho lingine na mwanasaikolojia Maslow (1943, 1954) hasa katika kutimiza mahitaji ya kibinadamu kupitia hatua au ngazi ya juu namba 5, mtaalamu Maslow ameiita “self-actualization of human needs” … na ni nadra sana kufikia hatua hii kwa sababu ya vikwazo na kutotimiza mahitaji ya ngazi ya chini kama; hali ya kisaikolojia (1), usalama (2), uhusiano wa kijamii (3), na uwezo wa kujitambua na kujiamini(4).

Katika hali isiyo ya kawaida, watu wengi wamekuwa wakipima mafanikio yao au ya wengine kwa kipimo cha macho ya matamanio pekee hasa kwa kuangalia umiliki wa mali (material things) kama kumiliki magari, majumba ya kifahari na mengine mengi yanayovuta macho na hisia lakini kusahau hali ya kisaikolojia kama vile furaha, uhuru wa nafsi na fikra n.k. Pia wanaamini kuwa pesa pekee huleta furaha na uhuru wa fikra na ule wa nafsi.

Ndugu msomaji, ijulikane kuwa kupima mafanikio yako yaliyo ya dhati usiangalie kigezo kimoja tu, ni vyema kuzingatia mafanikio endelevu yajumuishayo kutimiza shauku au hitaji la moyo bila kutanguliza hofu kwanza na kubwa kuliko ni lile la kutimiza hitaji la kisaikolojia kama alivyoainisha Mwanasaikolojia Maslow- kutimiza mahitaji  ya ngazi ya chini ili kupelekea kupata mafanikio ya kweli yasiyo na mawaa.

Makala inayohusiana: The Truth About What It Means to Be Successful

Imetayarishwa na

Henry Kazula,

Mwandishi wa Kitabu-Mtazamo Wako Ni Upi?

Imetolewa na

Jielimishe Kwanza.