MTAZAMO: KUELEKEA MWAKA 2014, TUJIELIMISHE! TUJIFUNZE! TUJIPANGE UPYA KUPITIA MAKOSA…

K

ujifunza kwa kweli na kwenye tija ni kupitia MAKOSA yaliyofanyika awali, hii ni kwa sababu, hayo ndiyo yametufikisha hapa tulipo.

Nikiwa katika mapumziko, sehemu tulivu yenye upepo mwanana pembezoni mwa Mlima mrefu Afrika, uliopo nchini Tanzania-Mlima Kilimanjaro (http://www.tanzaniaparks.com/kili.html), nafakari kuhusu mwaka 2013 na kupanga mikakati kuelekea mwaka 2014…naamua kuperuzi katika maktaba yangu ndani ya “laptop” nakutana na kijitabu kiitwacho “Tujisahihishe” cha Mwl.J.K.Nyerere (1962) chenye kurasa 8.

Nikashawishika na jina la kijitabu hicho, hivyo nikataka kujua kulikoni ndani yake…Mwanzoni ilibaki kidogo niachane nacho, kwa sababu kilikuwa kikielezea makosa ndani ya T.A.N.U, najua hata wewe unaweza kusema nani anasoma vitabu vya T.A.N.U hadi leo?

Nikakumbuka msemo huu; ya kale ni dhahabu, ikanijia shauku ya kutaka kuyajua makosa hayo…yawezekana yamekufikisha/yametufikisha hapa tulipo.Nikaanza kusoma kwa makini na kufumbuka macho kujionea makosa ya mwaka 1962 ambayo Watanzania tunaendelea kuyafanya kwa kujua, kwa mazoea au kutojua…

“Nitanukuu moja ya makosa yaliyoainishwa na Mwalimu, Jielimishe Kwanza! inaliona kosa hili kubeba makosa mengine tunayoyafanya kila siku;

Kosa jingine ni kutojielimisha.Kanuni yetu ni moja inasema: “Nitajielimisha kwa kadiri ya uwezo wangu wote na kutumia elimu yangu kwa faida ya wote”. Kwa ufafanuzi zaidi, anasema; Kujielimisha siyo maana yake kwenda shuleni. Kujielimisha ni kutafuta ukweli wa mambo. Kwenda shule hutusaidia.Lakini japo hatuwezi kwenda shule twaweza kujifunza”.

Watu wengi hukoma kujielimisha mara tu wakihitimu masomo yao na kufikiri kuwa wanajua kila kitu.Mwl.J.K.Nyerere katika kitabu hicho anawaainisha:

 “watu walio hatari sana ni wale ambao wanafikiri kuwa wanajua kila kitu wala hawana haja kujifunza zaidi.

Nabainisha haya kwa kukuhamasisha ndugu msomaji kukaa chini na kutafakari makosa uliyoyafanya mwaka 2013 ili usiyarudie mwaka 2014.

Ikiwa unajiona hukufanya kosa au makosa, tambua kuwa hakuna mkamilifu katika dunia hii…Maandiko Matakatifu yamebainisha.Nilihamasika sana na mwisho wa kitabu cha Mwalimu, aliweka wazi, nanukuu; sitaki Mtu ye yote afikiri kuwa mimi niliyeandika maneno hayo sinayo makosa.Hivyo si kweli.Hii na kwangu kadhalika, najifunza sana kupitia makosa ninayofanya.

Naomba nisiwe msimuliaji sana wa maneno ya Mwalimu, hamasika kujisomea mwenyewe kijitabu hicho ili ujue makosa mengine ili yasijirudie kwako.

Soma hii   http://hakielimu.org/files/publications/document149tijisahihishe.pdf

Tena na tena, naomba utumie wakati huu mzuri wa mapumziko kujichunguza mapungufu yako yaliyopelekea kufanya makosa uyajuayo.Jielimishe! Jipange upya kwa kujiwekea mikakati ukijifunza kwa makosa.

Nakutakia mapumziko mema na kukutakia heri na fanaka ya Krismasi na Mwaka mpya 2014.

Imetayarishwa na

Henry Kazula,

Mkurugenzi mtendaji.

Jielimishe Kwanza!

MTAZAMO: TASWIRA UNAYOWAJENGEA WATU WENGINE INAKUWA UHALISIA WAKO…

“The image you create about others and think it is real, becomes your reality”-Henry Kazula.

M

ara nyingi tumekuwa tukiwafikiria na kuwasema wengine kinyume na uhalisia wao.Kuna watu huwafikiria wengine mabaya tu, pia kujiaminisha kuwa mafanikio ya wengine si ya halali au maisha wanayoishi wengine si halisi.

Yaani, tunawafikiria wenzetu mabaya! mabaya! tu.Huu ni mtazamo hasi uliojijenga ndani ya nafsi za watu.

Kwa kipindi kirefu Jielimishe Kwanza! imefuatilia suala la mtazamo wa watu kuhusu maisha na watu kwa ujumla.Imebainika kuwa ukiwasikiliza watu 5 kuhusu ufikiri/mtazamo wao kwa watu fulani waliofanikiwa na hata wale wasiofanikiwa utagundua kuwa ni mmoja tu atakayetoa maelezo yenye mtazamo chanya.Kama huamini, fanya jaribio hili la kupima mtazamo wa watu.

Ikiwa taswira unazojingea kuhusu wengine ni hasi, huu utakuwa ni uhalisia wako! na utajiaminisha, utakuwa ni mtu wa manung’uniko, masengenyo, kukata tamaa ya maisha kwa kujiaminisha kuwa huwezi kufanikiwa kwa njia ya halali inayohusisha juhudi zako binafsi.Madhala yake kwa Taifa ni makubwa, hususan kuongezeka kwa wimbi la umasikini na utegemezi ndani ya jamii.

Pia utajikuta umeanza kujijengea mbinu zisizo sahihi kupambana na uhalisia unaofikiria kuhusu hali na tabia ya maisha ya wengine.

Nikirudi kwenye mahusiano kwa wanandoa, kuna hatari kubwa endapo mmoja wa wanandoa atakuwa na taswira hasi kuhusu mwenziwe.Mfano, mmoja akimfikiria na kujenga taswira kuwa mwenziwe anatoka nje ya ndoa, itamjenga na itakuwa ni uhalisia wake bila ya kuwa na utafiti wa kina.Hili hupelekea kuvunjika kwa ndoa nyingi kwa sababu ya kukosa kuaminiana.

Nakuhamasisha ndugu msomaji, kubadili mtazamo kwa kujifunza jinsi ya kuishi na watu na kufahamu njia halali za mafanikio yao…fuatilia historia zao ili uwe na uthibitisho wa unachokiamini, kufikiria kabla ya kutoa ushuhuda mbele ya wengine.

Soma hii http://jielimishekwanza.blogspot.com/2013/06/mtazamo.html ili uwe na mtazamo chanya.

Tukumbuke kuwa, Maaandiko Matakatifu yanatuasa kuwa si vizuri kufikiria na kuwasemea wengine mabaya.

Imetayarishwa na kutolewa na

Jielimishe Kwanza!

MTAZAMO: MAKOSA 10 YANAYOWEZA KUINYIMA AKILI YAKO UHURU WA KUFANYA KAZI YAKE BARABARA...

-->

T

 ukikumbushana moja ya makala zetu kuhusu viashiria vya kutekwa kwa uhuru wa fikra,mtazamo, uchumi wa mtu binafsi http://jielimishekwanza.blogspot.com/2013/12/mtazamo-hivi-ndivyo-uhuru-wako.html

Picha na stepontoliquid.wordpress.com

naomba nikulete kwenye makala ya  leo kuhusu makosa yanayoweza kuinyima akili uhuru wa kufanya kazi yake barabara-(mbele ya kila kosa kuna suluhisho);

1.   Kutojielimisha-kujielimisha ni njia ya kujua ukweli wa mambo

2.  Kupuuza usomaji wa makala na vitabu- ukweli wa mambo hufahamika kupitia kulinganisha mawazo ya watu tofauti tofauti…Unasoma mawazo yao kupitia vitabu au makala zao au kuongea nao.

3.   Kupuuza mawazo ya wengine-kuwa msikivu zaidi na si muongeaji zaidi bila kupuuza wazo la mwingine

4.   Kujifanya mjuaji wa yote-tambua kuwa siku zote tunajifunza vitu vipya, huwezi kujua kila kitu

5. Kuwa na majibu rahisi kwa maswali magumu(huu ni uvivu wa kufikiri)-tuepuke kubashiri kwa hisia na kutoa majibu rahisi ya matatizo/maswali magumu…tuiruhusu akili yetu itafakari kwa kujiuliza maswali ya msingi na kutoa majibu ya matatizo.

6. Kuchagua viongozi wasio na sifa…hawa hukunyima fursa ya kutoa mawazo yako na kukufanya uwe mtumwa wa fikra zao-tuwapime viongozi kwa uwezo wao wa kuongoza wenye kujua wameteuliwa kwa manufaa ya wananchi na si unafsi.Tuwaepuke viongozi wanaoamini zaidi mawazo yao binafsi kwa manufaa yao na kuyafanya ya wengi.

7.   Kutumia pombe na madawa ya kulevya kupindukia-punguza au acha matumizi ya pombe na madawa ya kulevya.

8. Kutopata muda wa kukaa mwenyewe na kutafakari maisha yako-jiwekee utaratibu wa kukaa mwenyewe na kutafakari kuhusu changamoto za maisha.

9. Kutegemea wengine wakuamulie kila kitu au wakuthibitishie maamuzi yako-jiamini, tambua kuwa wazo lako ni wewe unayejua hatma yake.Ujue kuwa katika dunia hii kuwa wakatisha tama wengi.Wakati mwingine ni vyema kufanya mambo yatokee…ukikosea, jifunze tena kwa kupitia makosa hayo.

10. Hofu ya kukosea-Wavumbuzi wengi duniani walifanya makosa mengi sana…wakajifunza kupitia makosa.(Ungana nasi kwenye makala ijayo yenye kichwa:TUJIELIMISHE! TUJIFUNZE! TUJIPANGE UPYA KUPITIA MAKOSA…

Mfano wa Thomas Edison katika kuvumbua taa ya umeme alifanya makosa 1,000.Edison alichulia makosa haya kama ni njia 1,000 za kutengeneza taa ya umeme.Jifunze kwa watu mashuhuri duniani waliofanya makosa kupitia http://www.uky.edu/~eushe2/Pajares/OnFailingG.html 

Ikiwa hujanielewa na unahitaji ufafanuzi zaidi, tafadhali usisite kuwasiliana nasi.

Imetayarishwa na kutolewa na,

Jielimishe Kwanza!  

MTAZAMO: HIVI NDIVYO UHURU WAKO UNAVYOWEZA KUTEKWA

-->

Jielimishe Kwanza wanapoamua kukuelimisha kuhusu uhuru hawamaanishi wa nchi au Taifa ila ni ule uhuru wa mtu binafsi.Hii inamaanisha kuwa uhuru wa Taifa kwa ujumla wake unaanzia na mtu mmoja.

Picha na www.freedomideas.com

Nikimnukuu Mkurugenzi wa Jielimishe Kwanza! Henry Kazula katika moja ya mafunzo yake aliwahi kusema; "Mtu mmoja hawezi kuleta mabadiliko yote katika dunia, lakini mabadiliko duniani huanzia na mtu mmoja".

Taifa linaweza kuwa huru lakini watu wake wanaweza wasiwe huru kimtazamo, kiakili, kiuchumi na kifikra.

Ndugu msomaji najua kwa haraka haraka unaweza usinielewe…soma makala hii ukiirudia tena.Naomba nikukumbushe moja ya makala zetu inayoelezea na kutoa suluhisho la jinsi ya kuepukana na utumwa wa kifikra http://jielimishekwanza.blogspot.com/2013/09/mtazamo-hivi-ndivyo-tunavyoweza.html

Pia nikulete moja kwa moja kwenye suala la jinsi uhuru wako unavyoweza kutekwa na mtu mwingine bila wewe kujua. Vifuatavyo ni baadhi ya viashiria vinavyozingatia mtazamo wa kisaikolojia;

1.       Kupewa vitu au fedha bure
2.     Kutumika kifedha na si fedha ikutumikie (working for money and not money working for you).

Ikiwa una kiashiria kingine, tuandikie kupitia barua pepe jielimishekwanza@gmail.com

Hamasika! Hamasisha Uhuru wa Kimtazamo, Kiakili, Kiuchumi na Kifikra. 

Usikubali mtu atawale Uhuru wako!

“I know but one freedom and that is the freedom of the mind.” ~Antoine de Saint-Exupery

Imetolewa na

Jielimishe Kwanza!

AJIRA: ATHARI YA KUFANYA KAZI KATIKA MAZINGIRA YA UTUMWA WA KISASA KWA MFANYAKAZI"

N

ikirejea makala zangu mbili kuhusu kazi na ajira: jielimishekwanza.blogspot.com/2013/10/ajira-na-kazi-jiepushe-zuia-utumwa-wa.html na http://jielimishekwanza.blogspot.com/2013/10/kazi-na-ajira-hivi-ni-viashiria-vya.html nataka nikujuze kuhusu athari kwa mfanyakazi aliye katika mfumo wa kazi wenye chembe chembe za Utumwa wa Kisasa kama ijulikanavyo kwa lugha ya Kiingereza (Modern-day Slavery).
 

Kutokana na utafiti wa hivi karibuni uliofanywa na Jielimishe Kwanza! katika maeneo mbali mbali ya kazi, umebaini  athari zifuatazo, ambazo huwapata wafanyakazi katika mazingira ya kazi;

1.Kushuka kwa hamasa na shauku ya kufanya kazi.Hivyo, wafanyakazi wengi wanafanya kazi kwa mazoea tu, bora siku ziende.

2.Kudhoofika kwa ubunifu na mbinu za utendaji wa mfanyakazi binafsi…mfanyakazi anakuwa na mtu wa kufuata maelekezo tu!

3.Kuongezeka kwa manung’uniko ya chini chini na migomo baridi kazini.

4.Kufanya kazi kwa hofu ya kukosa ajira…hapa ndipo uhuru wa mfanyakazi unapotekwa. Soma makala inatakayofuata: “Hivi ndivyo uhuru wako unavyoweza kutekwa”.

5.Kukosa fursa ya kuchangia na kutoa maoni katika kuboresha maslahi ya mfanyakazi…maamuzi ya uongozi ni ya mwisho haijalishi mfanyakazi ana mchango gani kwenye kampuni, shirika au taasisi.

Ikiwa unakumbwa na athari mojawapo kati ya hizi, jichunguze kwa makini, je una mchango gani katika eneo la kazi? Nini kinahitajika kazini ili uweze kuheshimiwa na kupata haki yako kulingana na jitihada zako?...ukiwa huna jibu sahihi au upo njia panda usisite kuwasiliana na jopo la Jielimishe Kwanza! katika eneo husika, utapata ufumbuzi wa kuishi kwa ndoto yako na kufuata kile moyo unapenda kufanya.

Tunakutakia kila la heri katika kupambana na utumwa wa kisasa katika maeneo ya kazi.

Imetayarishwa na kutolewa na

Jielimishe Kwanza!

AFYA: DESEMBA 1 SIKU YA UKIMWI DUNIANI

AFYA: UNAJUA UNAKULA NINI KULINGANA NA KIPATO CHAKO?

T

unapozungumzia suala zima la afya bora ni hali ya kuwa vyema kimwili bila kuwa na ugonjwa au dalili ya ugonjwa.Watu wengi hujipongeza sana kwa kuamini kuwa afya ni unene…la hasha!

 Afya bora hujengwa/huboreshwa na makundi ya vyakula yenye virutubisho kama wanga,protini,vitamini, madini, mafuta, maji safi na salama.

Ukosefu wa lishe bora na ulaji mbaya umepelekea matizo mbali mbali kwa watoto na watu wakubwa.

Ukosefu wa kipato hupelekea kukosa lishe bora na wakati huo huo kuwa na kipato kikubwa hupelekea kuongezeka kwa uzito wa mwili uliyokithili sambamba na magonjwa yasiyoambukiza kama kisukari,kansa na matatizo ya moyo.

Je, ulaji wako ni upi kwa kuzingatia mchoro ufuatao…A au B?

Jichunguze kwa makini, jiweke katika mfumo husika wa ulaji...A au B, Jiulize, hivi nilivyo kiafya ni sahihi kulingana na kanuni za ulaji bora? Ikiwa si sahihi, Jielimishe Kwanza kwa kuuliza wataalamu wa lishe,soma vitabu, makala na majarida muhimu kuhusu afya.

Ikiwa hujanielewa, usisite kuniandikia au kunipigia simu...nitakuelewesha. 

Nakutakia kila la heri katika zoezi hili muhimu la kuboresha afya yako na wengine.

Imetayarishwa na kutolewa na

Jielimishe Kwanza!

AFYA: KUCHEMUA/KUPIGA CHAFYA, KUKOHOA KWA KUTHAMINI AFYA YA WENGINE

--> -->

K

atika kufuatilia kwa ukaribu tabia na mazoea ya watu mbalimbali jijini Dar es salaam kwa suala linalohusu afya, Jielimishe Kwanza! imegundua na kusikitishwa kuona watu wengi huchemua/hupiga chafya bila kutumia kitambaa safi ili kuwakinga wengine dhidi ya maambukizi ya magonjwa yasambaayo kwa hewa kama mafua na kifua kikuu.

Naomba radhi kwa maneno makali nitakayoyatumia…ni kwa lengo zuri tu la kukumbushana na kuelimishana!

Wapo wanaotumia mikono yao kuzuia kusambaa kwa mate na makohozi au kushika pua kutoa kamasi na mara tu wakimaliza hutumia mkono kusalimiana na wengine…kwa kweli hii si nzuri kiafya.

Sambamba na kuchemua na kukohoa, wapo watu wengine hutema makohozi, mate hovyo bila kuzingatia kuwa kuna mtu/watu jirani yake.Kiuhalisia, tabia hii si nzuri kiafya na mazingira kwa ujumla.

Si lazima kwenda shule sana ndipo ijulikane kuwa kutumia kitambaa safi kufunika pua na mdomo ni muhimu kwa afya…utajisikiaje kuona mtu mwingine akikurushia mate/makohozi usoni kwa chafya? Ikiwa hatupendi kufanyiwa hivyo, tusiwafanyie wengine. Hili ni suala la uelewa tu, halihitaji kuwa na shahada.

Picha na news.discovery.com

Ikiwa una mazoea tajwa naomba uchukue hatua ya kubadika na kuwahamasisha wengine kubadilika.

Jali afya ya wengine kama unavyojijali, Punguza kuenea kwa magonjwa yanayoenezwa kwa hewa.

Imetolewa na

Jielimishe Kwanza!

BIASHARA: ELEWA KWANZA MTAZAMO WA WATEJA KABLA YA KULETA HUDUMA/BIDHAA KWENYE SOKO

-->

Makampuni mengi huwekeza fedha nyingi kwa utafiti wa masoko ya biashara zao lakini husahau suala muhimu sana la kujua kwanza mtazamo wa wateja.

Huu ni mtazamo mpya katika muundo wa biashara utakaokufanya ufanikiwe sana katika biashara yako:

 

Je, muundo wa biashara yako unawatazama wateja kwanza kabla ya kufikiria faida kutoka kwao?

Ukiihitaji ushauri kuhusu muundo wa biashara wenye mafanikio wasiliana na  

Jielimishe Kwanza!

Imetolewa na

Jielimishe Kwanza!

VIJANA NA VIPAJI: Mkurugenzi mtendaji wa Jielimishe Kwanza! azindua “Evening Talk Program”

I

likuwa ni wakati mzuri kwa Jielimishe Kwanza! kupata fursa ya kushirikiana na Taasisi nyingine katika masuala mbali mbali ya kijamii.

 Asasi isiyo ya kiserikali ijulikanayo kwa jina “Human Talent Watch" (H.T.W) iliyopo Mbezi-Msuguli- jijini Dar es salaam imeanzisha program maalumu ya kuibua na kukuza vipaji kwa vijana ijulikanayo kwa jina la “Evening Talk Program” ikimaanisha “maongezi rasmi ya jioni “ kwa kuwashirikisha watu waliofanikiwa kwa kutumia vipaji ili kuwatia moyo na kuwapatia mbinu  vijana chipukizi katika vipaji husika.

Programu hiyo maalumu na yenye tija kwa vijana wenye vipaji nchini Tanzania ilizinduliwa Jumamosi , 9 Novemba 2013 na Mkurugenzi mtendaji wa Jielimishe Kwanza! ndugu Henry Kazula majira ya jioni.

Akiongea moja kwa moja na mwandishi wa Jielimishe Kwanza! mwenyekiti wa H.T.W ndugu Frank Mihayo alifanunua zaidi malengo ya “Evening Talk Program”, alisema;

…programu hii ni maalumu kwa kuwakutanisha vijana wenye umri kuanzia miaka 12-35 pamoja ili kujifunza/kupata mbinu mbali mbali zitakazowasaidia kutimiza ndoto zao. ”Evening Talk” ni chimbuko la la maarifa sahihi kwa vijana-“a source of perfect knowledge”.Pia ni fursa maalumu kwa vijana chipukizi wenye vipaji kukutanishwa na vijana mashuhuri waliofikia mafanikio ya ndoto zao katika nyanja mbali mbali-sanaa,uchumi,uongozi na biashara.

Ndugu Mihayo alikazia zaidi kuwa, watu waliofanikiwa kwa vipaji vyao watapata fursa ya kutoa mada zenye kuchochea hamasa ya mafanikio kwa vijana kupitia vipaji. Kwa vijana chipukizi watapata fursa ya kujijengea hali ya kujitambua,kujiamini,kujifunza mambo mapya kuhusiana na vipaji na kupata nafasi kuunganishwa na wadau mbali mbali.

Katika kutimiza azma ya mpango huu kuna changamoto zifuatazo;

1.       Kukosa ukumbi wa kuendeshea programu hii
2.       Ukosefu wa fedha za uendeshaji kama kalamu na madaftari ya kuhifadhia kumbukumbu
3.      Fedha ya kuitangaza programu hii kwenye vyombo vingine vya habari ili vijana wengi wapate fursa ya kushiriki na kujifunza.

 ____________________________

MATUKIO KATIKA PICHA

Mkurugenzi mtendaji wa Jielimishe Kwanza! ndugu Henry Kazula akikata utepe kuashira kuzinduliwa kwa programu maalum kwa vijana ijulikanayo kama "Evening Talk".Kulia kwake ni Mwenyekiti wa H.T.W ndugu Frank Mihayo.

Mkurugenzi mtendaji wa Jielimishe Kwanza! ndugu Henry Kazula akiongea na vijana wenye

vipaji vya mpira,muziki na uigizaji.

Katika nyuso za furaha vijana wenye vipaji vya muziki,uigizaji na mpira wakiwa na Mkurugenzi mtendaji wa Jielimishe Kwanza! ndugu Henry Kazula kwa pamoja na Mwenyekiti wa H.T.W ndugu Frank Mihayo.

Mwisho wa yote, mgeni rasmi alipewa fursa ya kuongea na vijana; alijaribu kuwashirikisha kwa kurejea moja ya makala zake kupitia Jielimishe Kwanza! ijulikanayo kwa kichwa

“Jinsi ya kupaza sauti ya mafanikio na jamii ikukubali" Soma hii  http://jielimishekwanza.blogspot.com/2013/05/jinsi-ya-kupaza-sauti-ya-mafanikio.html

Ikiwa umeguswa na program hii na unataka kuchangia kwa njia moja au nyingine usisitize kuwasiliana na Mwenyekiti wa H.T.W kwa namba +255 752 297 264 au muandikie kupitia barua pepe humantalentwatch@gmail.com

Imetayarishwa, Imetolewa na

Jielimishe Kwanza!